فيروزيات ( الحلقة الأولى )
زيزتي السيدة فيروز … بقلم / د. محمد عودة
عم اكتبلك لانه قلبي محروق …و بدون مقدمات أنا عاتب عليكي .وزعلان منك..
من أنا و زغير و انتي بتخبريني عن عالم حلو و ناس طيبين و كل شي منيح … يمكن إنتي قرفانة مثلي هالإيام من الوضع و مش عم بتابعي الأخبار.
خلليني إعطيكي فكرة عن هيدا العالم شو صار فيو …
قبل كل شي، لا تسأليني كيفك انت ? لأني مني منيح
و رح قللك ليش.
البوسطة يللي كانت ناقلتنا من ضيعة زعترة على ضيعة ترمسعيا،تمويه مرقت بسلواد ,و هيدا يلي بيوكل خس سلمتو مرتو للجيش الصهيوني بضمانة الامريكان واتهمت الاغيار و صار يللي صار وهيو عند المخابرات… و من وقتها و ليالي الشمال حزينة و الظاهر ر ح تبقى حزينة …
القهوة يللي عالمفرق الواد بالقدس العتيقة بعدها موجودة، بس زبوناتها عم يشربوا معسل بدل التنباك وكانت وقفتهم وقفة اسود دفاعا عن الاقصى.
قلتيلي احكيلي احكيلي عن بلدك ؟ شو بدي إحكيلك عن بلدي ؟ هيدي ما غيرا فلسطين الخضرة . الله وكيلك مع هل كرونا والاغلاقات مرة من عنا ومرة من عندهم خلتنا نفرم كل الأخضر يللي فيها، و سمعت إنو المحتلين عم يحضروا قانون عشان يضموا سهولها وجبالها و الوديان …
بحكيلك عن جسر العودة ؟ العوض بسلامتك … إسرائيل هدمتو بمساعدة ترامب والاميركان.
أحكيلك عن أسامينا ؟ و الله يا ست عم نندبح في سوريا وليبيا واليمن والعراق بسبب أسامينا … بتتذكري يا فيروز الدكانة يللي كانت بحي الشيخ جراح ؟ إيه هيدي سكرت لأن المستوطنين زوروا اوراقها وطفشوا صاحبها … و البنيات و الصبيان يللي كانوا يلعبوا عالمي صارت همومهم كبيرة وما عاد فيهم يلعبوا صارت قصتهم جدية ومش لعبة في مواجهة المستوطنين و المستعربين .
أما حنا السكران لسا سكران بس ما عاد ضروري يصور بنت الجيران لأنها من بعد ما عملت بوتوكس لشفافها صارت عم تحط صورها على الفيسبوك والانستغرام والسناب وتويتر و صار يشوفن وقت بدو.
خيو عزمي من زمان سافر على قطر وبعدو ما رجع , اما خيو نبيل صار يصلي مع المسلمين بالصف الاول وهو حاطط الصليب ويمكن هو رمز انتصار البوابات يا ست فيروز.
على فكرة بعدو في ناس عالمفرق تنطر ناس … بس حتى ينتفوا بعض واذا لزم الامر يطخو بعض بلرشاشات اذا حد فكر يتجاوز حد ثاني بسيارته او شكله ما عجب الشب الي جنبة بسيارة موديل سنتها خاصة في كفر عقب …
أما الهوى يللي عم ينسم علينا صارت ريحتو بشعة لأنها جاية من جهة الجيش يلي على دوار كازية الهدى في البيرة و مليانه فلفل وغاز ودخان مسيل دموع ….
في أخبار مش حلوة يا فيروز … مختار المخاتير عطاكي عمره من زمان … بس خيو أخذ المخترة من بعده و من وقتها بعدو مختار لأنو الظروف الأمنية القاهرة و الاحتلال ما عم تسمح إجراء إنتخابات …
بيّك يللي راح مع العسكر خطفوه المستعربين و اليوم هو موجود بسجن نفحه … أما عبدو فمسكين رمى حالو عن سطح البلدية لأن وردة الجورية تركتو و هربت مع مسؤول كبير كبر السما بعد ما شكلّها ألماس … بس الخبرية الحلوة إنو شادي ما عاد ضايع … إيه لقيناه … ليكو بالمخيم عم بحضر حالو ليصير شي مهم.
وبدي خبرك يا ست فيروز انه من زمان مهابيشنا ما دقت لانه اتفاقية باريس تمنعنا من استيراد الطحين والقهوة.
لبنان كمان مثلو مثل فلسطين مع فارق بسيط انه الاحتلال في لبنان داخلي و اخوي ومع هيك لازم تضلي تغني بحبك يا لبنان.
اما عندنا يا حسرتي تجمعت كل الاحتلالات.
كلمة أخيرة يا ست فيروز ، الله يرضى عليكي لا بقى تغني ردني إلى بلادي لانه اذا ما رديتي حالك ما حدا راح يردك لانهن كلهن مشغولين بالتتبيع والتطبيع مع المحتلين تحت عنوان اتفاقيات ابراهيم ولا عاد في قيم ولا اخلاق .
